القمر مسافر
بقلم
ماهر دياب
........
ولما اقول بليغ
واسكت ..
بلاقي آلاف
مع النغم الجميل
ننصت
وعشاق ياما
مش وحدي..
عشانه ونسنا في الوحدة
وفي الضلمة وجوده
فنار ..
بليغ حمدي علم
ومنار ..
على القمة بألحانه
وليه أشعار ..
بيبدأها على عوده
نعدي حدودنا
لحدوده..
نحس وجودنا في وجوده
وينشينا ..
يبكينا ..
وضوحنا مضفره
شروده ..
يعلمنا ..
( بلاش نحزن )
( ولا نفارق )
وزمنه الحاجز
السارق
لمعنى الراحة والفرحة
وقسوة دنيته الجارحة
وبلور ظرفها الطارئ
ولما يدق باب بيتها
مايوصلهوش ردود منها
عشان تسأل مين الطارق
فيتغنى بمعنى الوحدة بين ناسه
ظلال الحزن حراسه
وبيعافر ..
يمعن كل شيء سافر
وحتى الحزن يتضافر
مع السفر الطويل ويروح
ونترنم مع سماعه
نحس بصوت قلوبنا ينوح
وتجمعنا هناك دمعة
على تمعينها نتقابل
وينسج شوقنا بالكلمات
يصحي عادات
سابتنا وعودها بات
دابل
وننساق له
ونتفاعل
مقام ( الرست ) كان
فاعل ..
مع السفر اللي داخلنا
بعدم الود وسؤالنا
وحتى في قربنا بعدنا
ومهما حيينا أو موتنا
يزيد شوقنا لمبادئنا ..
تزاورنا
وضحكتنا
سلام الإيد
محبتنا ولمتنا
تهانينا
في يوم العيد ..
شموع وحدتنا نطفيها
ولمتنا
شموعها تإيد ..
وتحدفنا على بكرة
أكيد هتغير امبارح
نبدل ذكرى بالذكرى
ونتصافح ونتصالح
(( ظلمنا الحب )) بعنادنا
وسلمنا له وبعدنا
نمد إيدين محبتنا
عشان تنسانا غربتنا
اللي حسين بيها في وجودنا
برغم القرب مش قربا
برغم وجودنا ليه غربا
مابين الأهل إحساسنا
ضياع كامل
كما اليتمىى ..
مفيش للحب ليه رسالات
بتوصل من رسول القلب
مفيش يمكن أو احتمالات
يكون جوانا (( سيرة الحب ))
ليه معنى الحب بعدك مات
وخدنا للطريق الصعب ؟
وليه (( بنلف )) في الدائرة
وغاب النور في (( ليالينا ))
(( سفر )) زينا
و (( موكب حب ))
مالوش لازمة ندق الباب
طالما يقينا مفهوش حد
ولو هنادي ع الأحباب
ده مين هيرد ؟
(( ده القمر مسافر
والسهر مسافر
والفرحة مسافره
حتى الحزن سافر ))
ماهر دياب
