لملم جراحك يا ألم
أوعاك تصدق
بوح القلم
بكلمتين متبعترين
حب وحنين
وسطر نازف
على الورق
الحلم كان بشوش
ليه انقلب لكابوس
وتدوس الوحوش
فوق الوشوش
ومات الحلم
ومن سكات
اندفن
والجرح بيئن
من الوجع صاحي
يسامر الليل
بوصلة صباحي
و يستني أمل كداب
مسجون ورا
الف باب وباب
ومش جي
والعتمة كاتمة
فوق الصدور
بعد ما تعب النور
ونام وسط ضلام
فارد قلوعه
ع السهرانين
و على دا الحال
دندن الليل موال
يشعل في القلب
خيال
دا انا ياما اتمنيت
أكون خيال
أسبق بفرسي الريح
واطبب قلوب المجاريح
ولساك بتسأل
هو لسه فيه
في الحلم أمل؟
دا الحلم مات واندفن
من سكات؟
بقلم: سيد جعيتم
جمهورية مصر العربية
ليست هناك تعليقات:
إرسال تعليق