بالعامية المصرية
( غصب عنِّي )
تأليف / متولي بصل
بنت عمِّي يا بنت عمِّي
يا اللي من لحمي ودمِّي
الشيطان فرَّق ما بينَّا
بس لسه أبوكي عمِّي
لازم أفرح لك في فرحك
وانسى حزني وانسى همِّي
افرحي براحتك وغنِّي
حتى لو فرحك قتلني
خلِّي قلبي يفوق ويصحى
حتى لو مات م الألم
غصب عنِّي لازم اضحك وابتسم
وارسم الفرحه وانا م الحزن قلبي بينقِسم
واجي اهني لك في فرحك
يا اللي لسه ف قلبي جرحك
يا اللي كنتي خلاص نصيبي
كنت فاكرك قسمتي وقلبك حبيبي
كنتي أقرب من قرايبي
كنتي أهلي انتي وحبايبي
كل ما اطلع والا أنزل
ألقى طيفك ماشي جنبي
وامَّا ابات سهران لوحدي
ييجي ويبات جوه قلبي
افرحي براحتك وغنِّي
وانسي أي حاجه عني
خلِّي قلبي يفوق ويصحى
أصله حَبِّك غصب عنِّي
دمعه نزلت غصب عنِّي
مش عشان إنك تحنِّي
شفت أمي بتبتسم بالفرحه لكن
قلبها شايفه بيبكي
حتى بين الناس يا أمي
حاسه حزني وشايله همي
آه يا أمي يا ضي عيني
لو أبيع عمري وسنيني
واشتري فرحه لقلبك
جي أهني لبنت عمي
والا اكسر قلب أمي !
لا يا قلبي بلاش جنون
كل شيء في الكون يهون
إلا أمي .. .. إلا أمي
ليست هناك تعليقات:
إرسال تعليق