( تربله )
يوميات رمضانية
للشاعر / متولي بصل
يا عم رمضان
طوف على أهلي وناسي
وقول لهم
كل شيء حوالينا
أصبح بالريموت
وانتوا لسه بتلعبوا
دومينوا وكوتشينة وطاولة
ده احنا ف زمان الكمبيوتر
والموبايل والكروت
يعني عصر التكنولوجيا في كل دوله
كل شيء بقى في المحلات والبيوت
اللي بيحاول ينول
واللي ما يحاولش
يبقى غيره أولى
ليه تسيبوا الوقت يهرب
أو يفوت
كل ثانية تستحق مليون محاوله
إمَّا نتقدِّم وإمَّا راح نموت
الحياة عايزة عمل
مش عايزة عِولا
ليه نشتري من الصين بضاعه
واحنا أرباب الصناعه
كل حاجة بنشتريها
حتى سجادة الصلاه
واحنا قاعدين للمزاج
والنعنشة والصهلله
الظروف في بلادنا واحده
همه جالهم فوقه ليه
واحنا جالنا تربله
دول خلاص وصلوا القمر
واحنا لسه مدروخين
قاعدين نشد معسِّله
ليست هناك تعليقات:
إرسال تعليق