( رمضان كريم اصحى يا غفلان )
يوميات رمضانية
للشاعر/ متولي بصل
رمضان كريم اصحى يا غفلان
رمضان هدية من الرحمن
يبدر بذور الحب في الأكوان
ويقيد شموع الخير في كل مكان
ويمسح بإيده دمعة الغلبان
ويزيح هموم القلب فيها غرقان
القلب مخنوق مَل م العصيان
والناس في شوق للعفو والغفران
**************************
بين الخلايق من طابور لطابور
ولا مرَّه واحده جه عليك الدور
عايش ونِفسك يوم تبات مسرور
بس الحياه مليانة أذى وشرور
ع الأرض تعبك في التراب مبدور
وانت بتشقى فيها زي التور
لا حد قال لك سعيكم مشكور
ولا حد قدَّر تعبك المهدور
الفرصة جت لك لحد باب الدار
كل اللي مطلوب توب إلى الرحمن
**************************
قدَّام عينيك فانوسك المسحور
وبين إيديك خاتم هنا وسرور
رمضان كريم متَّع عينيك بالنور
واشرب من الهنا والسعادة بحور
قبل ما يغيب عن عينيك لشهور
وتلاقي نفسك في الهموم مقبور
قوم شد حيلك واجبر المكسور
وابني لنفسك فوق فيلل وقصور
ربك جعل لك جنة فيها الحور
عالِم بإنَّك في دنيتك مقهور
إصحى وقوم ربك كريم وغفور
دي ليلة واحدة بالعمر يا غفلان
ليست هناك تعليقات:
إرسال تعليق