يوميات رمضانية
للشاعر / متولي بصل
كار النجارة
يا عم رمضان قوم بينا
نركب فلوكة ولا سفينة
خير ربنا في البحر كتير
نضمن فطور وسحور لينا
ولا نروح نصطاد عصافير
عصافير ناكلها مش زينة
أو نشتغل طلبة مشاوير
ديليفري ونطوف حوارينا
الاسطى جمال والحاج سمير
قاعدين بعلبة وفاترينة
حاجة تخلّي العقل يطير
يا رب تفرجها علينا
كار النجارة خلاص يا كبير
ولَّى وراح مع أهالينا
ولا بد نرضى بالتغيير
صنعة جديدة في إيدينا
لو حتى حلاق أو كوافير
هى الحلاقة صعبة علينا
أو حتى بواب ولا غفير
ان شا الله حارس في المينا
ولا فواعلي ولا أجير
الشغل مش عيب يا أخينا
العبد منَّا عليه التفكير
والمَولى قادر يرضينا
يا لا يا عم بلاش تأخير
الرزق بينادي علينا
ليست هناك تعليقات:
إرسال تعليق